Tourist Places of Koraput District/Part-1

ବିଷୟ: ଭ୍ରମଣ କରି ଯା’ନ୍ତୁ କୋରାପୁଟ ଜିଲ୍ଲାର ଏହି ସବୁ ମନୋରମ ସ୍ଥାନ |   ନିଷ୍କଳଙ୍କ ସତେଜ ସବୁଜ ଉପତ୍ୟକାର ପୃଷ୍ଠଭୂମି ଉପରେ ଅବସ୍ଥିତ କୋରାପୁଟ ଜିଲ୍ଲା ୧୯୩୬ ମସିହା ଏପ୍ରିଲ୍ ୧ ତାରିଖ ଦିନ ଗଠିତ ହେଲା | ଅରଣ୍ୟ, ଜଳପ୍ରପାତ, ଥାକ ଥାକ ସବୁଜିମାଭରା ଉପତ୍ୟକା ଏବଂ ଚଳଚଞ୍ଚଳ ଝରଣାରେ ପରିଶୋଭିତ ଏହି ଜିଲ୍ଲା ପ୍ରକୃତି ପ୍ରେମୀ ମଣିଷଙ୍କୁ ଆକୃଷ୍ଟ କରିଥାଏ | ଏହାର ପୂର୍ବ ସୀମା ରାୟଗଡାକୁ, ପଶ୍ଚିମ ସୀମା ଛତିଶଗଡ଼ର ବସ୍ତର ଜିଲ୍ଲାକୁ ଓ ଦକ୍ଷିଣ ସୀମା ମାଲକାନଗିରି ଜିଲ୍ଲାକୁ ସ୍ପର୍ଶ କରିଛି | ଏହି ଜିଲ୍ଲାର ଇତିହାସ ସଂପର୍କରେ ଉଲ୍ଲେଖ କରିବାକୁ ଗଲାବେଳେ ଏହାର ପ୍ରାଚୀନତା ଲମ୍ବିଯାଏ ସୁଦୂର ଖ୍ରୀଷ୍ଟପୂର୍ବ ୩ୟ ଶତକକୁ | ଯେତେବେଳେ ଏହା ଦୁର୍ଦ୍ଧଷ ପରାକ୍ରମଶାଳୀ ଆଟବିକମାନଙ୍କ ଦ୍ବାରା ଅଦ୍ଧୁଷିତ ଥିଲା | ପରବର୍ତ୍ତୀ କାଳରେ ଏହି ଅଞ୍ଚଳ ସାତବାହକ, ନଳ, ଗଙ୍ଗବଂଶୀ ଆଦି ବିଭିନ୍ନ ରାଜବଂଶଦ୍ବାରା ଏବଂ ଶେଷରେ ସୂର୍ଯ୍ୟବଂଶୀ ରାଜାଙ୍କ ଦ୍ବାରା ଶାସିତ ହୋଇଥିଲା, ଯେଉଁ ମାନେକି ବ୍ରିଟିଶ ଆଗମନ ପୁର୍ବରୁ କୋରାପୁଟକୁ ମନୋନୀତ କରିଥିଲେ | ପରିଶେଷରେ କୋରାପୁଟ ୧୯୩୬ ମସିହାରେ ଏକ ଜିଲ୍ଲାର ମାନ୍ୟତା ପାଇଥିଲା | କୋରାପୁଟ ଜିଲ୍ଲାର ଆୟତନ ୮୮୦୭ ବର୍ଗ କି.ମି. ଏବଂ ୨୦୧୧ ଜନଗଣନା ଅନୁସାରେ ଏହାର ଜନସଂଖ୍ୟା ୧୩,୭୯,୬୪୭ | ଏହି ଜିଲ୍ଲା ଦୁଇଟି ଉପଖଣ୍ଡରେ ବିଭକ୍ତ, ଯଥା : କୋରାପୁଟ ଓ ଜୟପୁର |ବହୁ ଭ୍ରମଣ ଯୋଗ୍ୟ ଏୈତିହାସିକ ସ୍ଥାନ ମଧ୍ୟ ଏ ଜିଲ୍ଲାରେ ରହିଛି | ଯଥା- ଗୁପ୍ତେଶ୍ବର ଶୈବ ପୀଠ, ଶାବର ଶ୍ରୀକ୍ଷେତ୍ର, ଆଦିବାସୀ ସଂଗ୍ରହାଳୟ, ଜୟପୁର, ଡୁଡୁମା ଜଳପ୍ରପାତ , କୋଲାବ ଡ୍ୟାମ, ଦାମନଯୋଡି, ଜୈନପୀଠ, ମାଳିଗୁଡା ରେଳ ସୁଡଙ୍ଗ ଇତ୍ୟାଦି | ଏସବୁ ସ୍ଥାନରେ ବର୍ଷସାରା ପର୍ଯ୍ୟଟକ ମାନଙ୍କ ଭିଡ ଲାଗିଥାଏ |
ଏ ଜିଲ୍ଲାର ଅଧିବାସୀ ମାନେ ପ୍ରବଳ ଆନନ୍ଦ ଉଲ୍ଲାସରେ ବହୁ ପର୍ବପର୍ବାଣି ପାଳନ କରିଥାନ୍ତି | ସେସବୁ ମଧ୍ୟରେ ରହିଛି ଚଇତ ପରବ, ବାଲିଯାତ୍ରା, ଦଶହରା, ଶିବରାତ୍ରି, ହୋଲି, ରଥଯାତ୍ରା | ତେବେ ମୁଖ୍ୟ ମହୋତ୍ସବ ହେଉଛି ନୃତ୍ୟ ଓ ସଂଗୀତ ଭିତ୍ତିକ ମହୋତ୍ସବ ‘ପରବ’, ଯାହାକି ପ୍ରତ୍ୟେକ ବର୍ଷ ପାଳନ କରାଯାଏ | ଜିଲ୍ଲା ପର୍ଯ୍ୟଟନ କାର୍ଯ୍ୟାଳୟ ୧୯୭୬ ମସିହା ଠାରୁ ଜିଲ୍ଲାପାଳ, କୋରାପୁଟଙ୍କ ପ୍ରଶାସନ ଅଧୀନରେ ରହି କାର୍ଯ୍ୟ କରି ଆସୁଅଛି | ଆନ୍ଧ୍ର ପ୍ରଦେଶର ବିଜୟନଗରମ୍ ରେଲୱେ ଷ୍ଟେସନ ଠାରେ ଏହି କାର୍ଯ୍ୟାଳୟର ଏକ ସୂଚନା କେନ୍ଦ୍ର ରହିଛି ଯାହାର ମୁଖ୍ୟ ଉଦ୍ଦେଶ୍ୟ ହେଲା; ଦର୍ଶକଙ୍କ ଦୃଷ୍ଟି ଅନ୍ତରାଳରେ ରହିଯାଇଥିବା କୋରାପୁଟ ଜିଲ୍ଲାର ଅବର୍ଣ୍ଣନୀୟ ପ୍ରାକୃତିକ ଶୋଭା ସଂମ୍ପଦକୁ ଲୋକ ଲୋଚନକୁ ଆଣିବା ତଥା କୋରାପୁଟକୁ ପର୍ଯ୍ୟଟନ କ୍ଷେତ୍ରରେ ଅଗ୍ରାଧିକାର ଦେଇ, ଏହାର ପର୍ଯ୍ୟଟନ ସ୍ଥଳୀ ଗୁଡିକର ବିକାଶ ସାଧନ କରିବା ଓ ଏହାକୁ ଜାତୀୟ ତଥା ଆନ୍ତର୍ଜାତୀୟ ପର୍ଯ୍ୟଟନ ମାନଚିତ୍ରରେ ସ୍ଥାନିତ କରିବା |
ଆଜି ଆମେ ଆପଣଙ୍କୁ ଏହି ଜିଲ୍ଲାର ପ୍ରମୁଖ ପର୍ଯ୍ୟଟନ ସ୍ଥଳ ବିଷୟରେ ଜଣାଇବାକୁ ଚାହିଁବୁ :-
•ଶ୍ରୀ ଜଗନ୍ନାଥ ମନ୍ଦିର: କୋରାପୁଟରେ ଜନଜାତି ସଂଗ୍ରହାଳୟ ନିକଟରେ ଓ ପାହାଡ ଉପରେ , ପୁରୀର ଶ୍ରୀମନ୍ଦିର ପ୍ରତିକୃତି ସମ ମହାପ୍ରଭୁ ଶ୍ରୀ ଜଗନ୍ନାଥଙ୍କର ଏକ ସୁନ୍ଦର ଓ ଛୋଟ ମନ୍ଦିର ରହିଛି ଯାହା ଶବର କ୍ଷେତ୍ର ନାମରେ ପ୍ରସିଦ୍ଧ | ଏହି ମନ୍ଦିରରେ ଯେ କେବଳ ପ୍ରଭୁ ଜଗନ୍ନାଥଙ୍କର ଏକ ଆବାସ ସ୍ଥାନ ତାହା ନୁହେଁ, ବରଂ ଏହା ଜଗନ୍ନାଥ ଚେତନାର ଏକ ବହୁମୁଖୀ ଧର୍ମୀୟ କ୍ଷେତ୍ର | ଏଠାରେ ଜନସାଧାରଣଙ୍କୁ ନିଶୁଳ୍କ ପ୍ରବେଶ କରିବାକୁ ଦିଆଯାଇ ଥାଏ | ଏପରିକି ଅଣହିନ୍ଦୁ ମାନେ ମଧ୍ୟ ଏଠାରେ ବିରାଜିତ ଶ୍ରୀ ଜିଉ ମାନଙ୍କୁ ଦର୍ଶନ କରି ପାରିବାର ସୁଯୋଗ ପାଇ ଥା’ନ୍ତି | କୋରାପୁଟର ବନ ପର୍ବତ ପରିବେଷ୍ଟିତ ଏକ ସୁନ୍ଦର ସ୍ଥାନରେ ଏହି ମନ୍ଦିର ପ୍ରତିଷ୍ଠିତ ଯାହା ଅନେକ ପର୍ଯ୍ୟଟକଙ୍କୁ ଆକର୍ଷିତ କରିବାର କେନ୍ଦ୍ରବିନ୍ଦୁ | ଯେ କେହି ବି କୋରାପୁଟ ଜିଲ୍ଲା ଭ୍ରମଣରେ ଯଦି ଯା’ନ୍ତି ଏହି ଶବର ଶ୍ରୀକ୍ଷେତ୍ରକୁ ନଯାଇ ଫେରି ଆସିଲେ, ତାଙ୍କର କୋରାପୁଟ ଭ୍ରମଣକୁ ଅସମ୍ପୂର୍ଣ ମନେ କରନ୍ତି | 
•ମାଳିଗୁଡା: ଜୟପୁର ଠାରୁ ପୂର୍ବପଟକୁ ୨୧ କି.ମି ଓ କୋରାପୁଟ ଠାରୁ ୪୩ କି.ମି ଦୂରରେ ଅବସ୍ଥିତ ମାଳିଗୁଡା ପ୍ରଶସ୍ତ ରେଳପଥ ସୁଡଙ୍ଗ | ବଣଭୋଜି ପାଇଁ ମାଳିଗୁଡା ଏକ ପ୍ରକୃଷ୍ଟ ସ୍ଥାନ ରୁପେ ବିବେଚିତ |
•କୋରାପୁଟ ଜିଲ୍ଲା ସଦର ମହକୁମା: ପ୍ରତିବର୍ଷ ଜିଲ୍ଲା ସସ୍କୃତି ପରିଷଦ ତରଫରୁ ଜିଲ୍ଲା ସଦର ମହକୁମା କୋରାପୁଟଠାରେ ଆୟୋଜିତ ଅଦିବାସୀ ଉତ୍ସବ ପରବ ନାମରେ ପରିଚିତ | ଏହା କୋରାପୁଟ ଜିଲ୍ଲାରେ ପାଳିତ ହେଉଥିଲେ ମଧ୍ୟ ରାଜ୍ୟ ସ୍ତରୀୟ ଉତ୍ସବର ମାନ୍ୟତା ପାଇଛି | ମାସ ବ୍ୟାପି ପାଳିତ ହେଉଥିବା ଏହି ଉତ୍ସବରେ ଖେଳ, ନାଚ, ଗୀତ, ନୌକା ଚାଳନା, ତୀର ଚାଳନା, କବି ସମ୍ମୀଳନି ଆଦି ଅନୁଷ୍ଠିତ ହୋଇଥାଏ | ଜିଲ୍ଲାର ବିଭିନ୍ନ ବ୍ଳକ ତଥା ଦେଶର ବିଭିନ୍ନ ପ୍ରାନ୍ତରୁ ଆସିଥିବା କଳାକାର ମାନେ ଏହି ଉତ୍ସବରେ ଭାଗ ନେଇଥା’ନ୍ତି | ଜିଲ୍ଲା ସ୍ତରରେ ମୁଖ୍ୟ ଉତ୍ସବ ୩ ଦିନ ପାଳିତ ହେଉଥିଲେ ମଧ୍ୟ ଏହାର  ମେଳା ୫ ଦିନ ପର୍ଯ୍ୟନ୍ତ ଚାଲିଥାଏ | ଏହି ଉତ୍ସବକୁ ଉପଭୋଗ କରିବାପାଇଁ ଦେଶ ବିଦେଶରୁ ବହୁ ସଂଖ୍ୟାରେ ପର୍ଯ୍ୟଟକ ଆସିଥା’ନ୍ତି | କୋରାପୁଟ ଜିଲ୍ଲା ସଦର ମହକୁମା କୋରାପୁଟ ରେଳ ଷ୍ଟେସନ ଠାରୁ ୩ କି.ମି ଦୂରତା ରେ ଅବସ୍ଥିତ |
•ବାଲଡା ଗୁମ୍ଫା: ବାଲଡା ଗୁମ୍ଫା କୋରାପୁଟ ଠାରୁ ୬୬ କି.ମି ଦୂରରେ ଅବସ୍ଥିତ ଏକ ପ୍ରାକୃତିକ ସୌନ୍ଦର୍ଯ୍ୟରେ ପରିପୁର୍ଣ୍ଣ ସ୍ଥାନ | ଏହି ଗୁମ୍ଫାଟି ଯେଉଁ ପାହାଡ ଉପରେ ଅବସ୍ଥିତ, ତାହାର ଉପର ଭାଗ ଚଟାଣ ଏତେ ପ୍ରଶସ୍ତ ଯେ ସେଠାରେ ଏକକାଳୀନ ୫ଟି ଫୁଟବଲ୍ ମ୍ୟାଚ୍ ଖେଳାଯାଇ ପାରିବ | ଏହାର ଅନତି ଦୂରରେ ଥିବା ଜଲାପୁଟ ଜଳଭଣ୍ଡାରର ମନୋରମ ଦୃଶ୍ୟ ବେଶ୍ ଉପଭୋଗ୍ୟ | ଚୈତ୍ର ପର୍ବ ସମୟରେ ସ୍ଥାନୀୟ ଲୋକେ ଏହି ଗୁମ୍ଫାରେ ଡଙ୍ଗରଦେଇ ଦେବୀଙ୍କୁ ପୁଜା କରିଥା’ନ୍ତି | ପର୍ବତାରୋହୀ ଓ ପ୍ରକୃତିପ୍ରେମୀମାନଙ୍କ ପାଇଁ ଏହି ସ୍ଥାନଟି ସର୍ବୋତ୍କୃଷ୍ଟ |
•ଆଦିବାସୀ ଜନଜାତି ସଂଗ୍ରହାଳୟ: ଏହି ସଂଗ୍ରହାଳୟଟି ଜଗନ୍ନାଥ ମନ୍ଦିରର ପଛପାଖରେ ଅବସ୍ଥିତ | ଏଥିରେ ସଂଗୃହିତ ହୋଇ ରହିଛି – ଏ ଅଞ୍ଚଳରେ ମିଳୁଥିବା ନାନାବିଧ ଖଣିଜ ପଥର, ଆଦିବାସୀମାନଙ୍କ ବ୍ୟବହୃତ ଅଳଙ୍କାର, ହାତବୁଣା ବସ୍ତ୍ର, ପାରମ୍ପରିକ ବାଦ୍ୟଯନ୍ତ୍ର, ସେମାନଙ୍କ ଘରକରଣା ଦ୍ରବ୍ୟ, କୃଷି ଉପକରଣ, ଶିକାର ପାଇଁ ବ୍ୟବହୃତ ହାତ-ହତିଆର ଆଦି | ଏଗୁଡିକୁ ଏଠାରେ ସୁନ୍ଦର ଭାବେ ସୂଚନା ଫଳକ ସହ ସଜାଇ ରଖା ଯାଇଛି | ଏଥିରୁ ପର୍ଯ୍ୟଟକମାନେ ଏ ଅଞ୍ଚଳର ଆଦିବାସୀମାନଙ୍କ ସଂସ୍କୃତି ସମ୍ପର୍କୀତ ଅନେକ ବିଷୟ ଜାଣିବାର ସୁଯୋଗ ରହିଛି | ଏହି ସଂଗ୍ରହାଳୟ କୋରାପୁଟ ବସ୍ ଷ୍ଟାଣ୍ଡ୍ ରୁ ୧ କି.ମି ଦୂରତା ରେ ଅବସ୍ଥିତ |
ପରବର୍ତ୍ତୀ ପୋଷ୍ଟରେ ଆମେ କୋରାପୁଟ ଜିଲ୍ଲାର ଆଉ କେତୋଟି ମୁଖ୍ୟ ପର୍ଯ୍ୟଟନ ସ୍ଥଳ ବିଷୟରେ ଆପଣଙ୍କୁ ଜଣାଇବୁ | ଏପରି ଉପାଦେୟ ସୂଚନା ପାଇଁ ଆମ ପେଜ୍ ସହ ଯୋଡି ହୋଇ ରହି ଥା’ନ୍ତୁ |